فيروز احمد ميمڻ: مشھور پبلشر/ناشر فيروز احمد ميمڻ 2 جنوري 1947ع تي، حيدرآباد ۾ محمد صالح ميمڻ جي گهر ۾ جنم ورتو. هن ايم.اي (اڪنامڪس)، ايم.اي (پوليٽيڪل سائنس)، ايم.اي (سنڌي) ۽ ايم.ايڊ تائين تعليم حاصل ڪئي. پيشي جي لحاظ کان استاد، هيڊ ماستر ۽ سبجيڪٽ اسپيشلسٽ طور ذميواريون نڀايون. هن شروعاتي دور ۾ ’سھڻي‘ رسالي ۾ ڪجهه وقت لکيو، ان بعد ’نيو فيلڊس پبليڪيشن‘ قائم ڪري ڪتاب ڇپائڻ لڳو. 40 سالن جي عرصي ۾ 260 کان وڌيڪ ڪتاب ڇپائي پڌرا ڪيا، جن ۾: سفرناما، ڪھاڻيون، شاعري، آتم ڪٿا، ترجمو ۽ ٻيا موضوع اچي وڃن ٿا. مشھور ناشر جي حيثيت ۾ هن شروعاتي دؤر ۾ سنڌ جي ڪيترن ئي مشھور اديبن، شاعرن، محققن ۽ سياستدانن جا ڪتاب ڇپائي پڌرا ڪيا. فيروز احمد سگا، ڪاروان ادب ۽ سھڻي پبليڪيشن سان به لاڳاپيل رهيو. سندس لکيل ۽ ترتيب ڏنل ڪتابن ۾: ”بين الاقوامي قانون (ايم. اي جي شاگردن لاءِ)، عظيم ڪھاڻيڪارن جون عظيم ڪھاڻيون (ترتيب)، ”آزادي خاطر“ (ترجمو ٿيل ڪھاڻيون) ۽ ”موتي جي مھراڻ جا“ (ڪھاڻيون، ترتيب) شامل آهن. اشاعت جي دنيا ۾ ڪم ڪرڻ تي کيس ڪيترائي ايوارڊ ملي چُڪا آهن، جن ۾: بھترين پبلشر ايوارڊ (محمد صادق گولڊ ميڊل) ۽ بھترين پبلشر ايوارڊ (ڪاروان ادب) اهم آهن.
1947.01.02 عيسوي
مشھور پبلشر/ناشر فيروز احمد ميمڻ 2 جنوري 1947ع تي، حيدرآباد ۾ محمد صالح ميمڻ جي گهر ۾ جنم ورتو.